Phili 1 | KYG | STEP | Nagaemo Polo'na'e Timoti'e'mo Yesu Kalaisi ali'ya'amo ne'alu'a vekala'mo mai'neta'a Polo'namo muki Filipai taonifi'mo mai'naya vaya'mo Kalaisi Yesupi'mo mai'naya vaya'mogitapae'mo mani avo'mo nekaove. Nagaemo muki lapaote vayafenagi konagatimogite'mo yagai'a ne'apataya vayatama vayafenagi mono ali'yate'mo mai'naya nikeni vayafenagi hu'na mani avo'mo nekaove.

Philippians 1

1 Nagaemo Polo'na'e Timoti'e'mo Yesu Kalaisi ali'ya'amo ne'alu'a vekala'mo mai'neta'a Polo'namo muki Filipai taonifi'mo mai'naya vaya'mo Kalaisi Yesupi'mo mai'naya vaya'mogitapae'mo mani avo'mo nekaove. Nagaemo muki lapaote vayafenagi konagatimogite'mo yagai'a ne'apataya vayatama vayafenagi mono ali'yate'mo mai'naya nikeni vayafenagi hu'na mani avo'mo nekaove. 2 Afotimo Goti'e Ala kava netimo Yesu Kalaisi'e'mo fiku lapa mae'ana lapami'anageno lapaipamo'mo falu hino.

Polo'a nunumu'mo huno apate'niya gemae

3 Muki afina'mo lapakaefe'mo nagesamo afi'nae'mo Goti'nimofe'mo hao ke nehove. 4 Lapakaemo hogote afinateti'mo Kalaisife'mo alagepa faigoko gemo aino atagu faesiyafe'mo nagae'e'mo afalu afalugana huta lokaeta mai'nona'mofe'mo muki afina'mo nunumu'mo hu'na nelapate'nae'mo namogaga ne'auve. 6 Goti'a lapaipafi'mo aepa faino ali'ya'mo alime alime ne'esigeno Kalaisi Yesu'a eminesiya afina'mo ali'ya'amo alino hano hugiye, hu'na lole nagesamo o'afi'na lokiya vai'na alagi nagesamo afi'na ne'mauve. 7 Goti'a fiku naha maeno nami'nige'na kalavusifi'mo mai'ne'nae'mo alagepa faigoko ge'amo ha maesuvafe'mo ge hu'na ali'na lokiya vai'na ne'atove. Fiku naha maeno nami'niya kava huno fiku lapa maeno nelapamigetae'mo magoke agufa ali'ya'mo aliteta muki afina'mo magoke laipa lagesamo ali'nona'mofe'mo lapakaefe'mo alagepa hu'na nagesamo ne'afuve. 8 Yesu Kalaisi'a lapakaefe'mo hau'niya kava hu'na lapakaefe'mo lusi kava huno ne'nahaiye, hu'na nehugeno'ae'mo Goti'a afiteno naha maeno'ae'mo, lama ge hiye, huno nehiye. 9 Nunumu'mo hu'na nelapate'nae'mo, Gotiyo, apaipafi'mo ali'ya'mo alige'apao alagepa hu'a afi'ne'a alagepa hu'a ali'a fako nehu'apa mago'e hu'a hapau apayamopafi'mo hapaino. 10 Alagepa hu'a age'ne'a ali'a fako nehu'apa hogote alagepa kava'mo agete'a akame hugae. Kalaisi'a eminesiya afina'mo afole aisigeno'ae'mo o'ani'ya kava'mo apaipafi'mo ohanesigeka vai'mo o'apamigane. Alagepa kava'mo Yesu Kalaisiteti'mo apaipafi'mo havai tenageno alagamo aenage'a vaya'mogi agete'a kagikale'mo ali'a asaga hiyo, hu'na nunumu'mo hu'na nelapatove.

Polo'a kalavusifi'mo mai'nigeno'ae'mo alagepa faigoko gemo aino atagu faeno uneno hu'niya gemae

12 Konaga'nimogitapae, hu'na, mani hisuva gemo afisayafe'mo nahau'niyanagi alagepa hutapa afiyo. Mani hanageke ya'mo nagaetegamo afole ai'niya'mofe'mo alagepa faigoko gemo'a mago'e huno aino atagu faeno uneno nehiye. 13 Muki ati vayanagi hogote gamani vekale'mo yagai'a ne'ataya ati vayanagi muki manile'mo mai'naya vayanagi hu'a Kalaisi agi'alefe'mo kalavusifi'mo mai'niye, hu'a ago nage'nae. 14 Kalavusifi'mo mai'noge'apae'mo asole konagatimogi ago nage'naya'mofe'mo lokiya vai'a mai'ne'apae'mo Ala kava nefe'mo mago'e hu'a apakesa afi'a fatago nehu'a koli osu'a he ti'a Goti ge'amo ae'a hakalo hu'a hapa nepaiye. 15 Mago vaya'amogi apaipa kafamo nahaete'a ae'a nagasesayafe'mo Kalaisife'mo ava gemo ae'a hakalo hu'a hapa nepaige'a mago vaya'amogi alagepa apaipafati'mo ae'a hakalo hu'a hapa nepaiye. 16 Ani vayapati'mo nagaefe'mo hapau'nige'apae'mo, alagepa faigoko ge'amo ha maesiyafe'mo Goti'a alino ate'niye, hu'a nagete'a Kalaisife'mo ava gemo ae'a hakalo hu'a hapa nepaiye. Alu vaya'mogimo apaipa'afati'mo ge nosafa ala apaki'apimo alisayafeke'mo ae'a hakalo hu'a hapa nepaiye. Kalavusifi'mo mai'noge'apae'mo, mago'e huta hanageke ya'mo amigune, hu'a apakesamo ne'afiye. 18 Afa'a ina agufa kava'mo hane'niye. Hosu apaipafati'mo Kalaisife'mo ava gemo ae'a hakalo hu'a hapa nepaifi lama ge apaipafati'mo Kalaisife'mo ava gemo ae'a hakalo hu'a hapa nepaisafigeno kanalene. Kalaisife'mo ava gemo ae'a hakalo hu'a hapa nepaiya'mofe'mo namogaga ne'auve. He, mago'e hu'na namogaga aiguve. 19 Lapakaemo nunumu'mo hutapa ne'natayanageno Yesu Kalaisi Auneme'amo'mo naha maeteno nagufamo alino katino nategaiye, hu'na ago afi'nove. 20 Hosu kava'mo hute'na navagage hisiya kavafe'mo alagi no'nahaiye. Alagepa kava'mo huguve, hu'na naipamo kalite'na navayagunagu hu'na agava ne'mauve. Hogote'na Kalaisi agi'ale'mo muki afina'mo ali'na asaga hu'novanage'na falisufi afa'a maisufige'na hemeni'e'mo ani kava'mo hu'na aise'amo koli osu'na agi'ale'mo ali'na asaga hugesuve. 21 Afa'a maisuvana Kalaisitefeke'mo afa'a maiguve. Falisuvana akamelegati'mo mago'e ya'nimo aliguve. 22 Ma mopafi'mo maisuvana mago'e hu'na ali'ya'mo alisugeno mago'e alagamo aegaiye. Na agufa kavafe'mo nahau'nifi hu'na o'afi'nove.

23 Lole kava'mo'a alino navayu hulino ne'viye. Ma mopamo atale'na u'na Kalaisi'e'mo maisuva naipamo nekaliye. 24 Falite'na u'na Kalaisi'e'mo maisuva kava'mo'a nagai'nilefe'mo aeno agaseno hogote alagepa kava'mo hane'niya'monanafa lapakaetefe'mo ma mopafi mai'ne'nae'mo lapa maesuva kava'mo'a ago aeno agase'niye. 25 He, mago'e hutapa Kalaisife'mo lapakesa afita fatago nehutapa lapamogaga aisaya kava'mo'a ko sisiyafe'mo u'na lapakae'e'mo lokae'na maiguve, hu'na ago afi'nove. 26 Halate lapakaetegamo u'na lokae'na maiguva'mofe'mo mago'e hutapa Yesu Kalaisife'mo lapamogaga aisayafe'mae.

27 Lapakaemo magoke kava'mo hutapa Kalaisife'mo alagepa faigoko ge'amo akame hutetapa alagepa kava'mo hutapa maiyo. Mai'nisage'nae'mo lapakaetegamo u'na lapakesufi olapakesufige'a mago vaya'mogimo, o'atale'a magoke apaipa apakesamo alite'a Kalaisife'mo alagepa faigoko ge'alefe'mo magokepi lokae'a mai'ne'a kame nehae, hu'a lapava gemo hu'a naha paisage'na afiguve. 28 Kame vayatapie'mo koli'apimo osutapa lokiya vaita maiyo. Lapakaemo ani kavateti'mo, alagi lageso hugae, hutapa alita apave lisage'a agegae. Agegaya'monanafa lapakaemo agetapae'mo, lagufamo alino katino lategaiye, hutapa agegae, Goti'a lapa maegaiya'mofe'mae. 29 He, Goti'a Kalaisifeke'mo lapakesa afita fatago hisaya kava'ageke'mo fiku alino olapami'nifa agaetefe'mo lapakafu kisiya kava'e'mo alino lapami'niye. 30 Kame hu'nogetapa ago nage'nae. Hemeni'e'mo kame nehugetapa nava gemo ne'afiye. Ani agufa kava'mo hutapa kame nehae.